قصیده لطمیه للاربعین {دلینی اعله گبر احسین یب احسین دلینی} المرحوم ملا صالح العبادی

دلینی اعله گبر احسین یبن احسین دلینی

عمّه یا بعد عمتک یم الگبر ودینی

فارگته عله التربان یومٍ سافرت عنّه

عدوی مارحم حالی او ما خلانی اودعنه

ارید اوصل لعد گبره او عن الصار اخبرنّه

وگلّه زینب آنه اختک خویه احسین حاچینی

حاچینی ینور العین فارگتک علی التربان

من غصبن یبن اُمی ترانی ابولیة العدوان

ادری یا بعد روحی انته اتعفّرت عطشان

جیت الیوم ازورنّـک وسجیک ابدمع عینی

عینی اشما تهل ادموع لیل انهار ابد مانام

ویّای الحرم وعلیل خویه احسین والایتام

ما یحتاج اخبرنّـک های احنه سبایه الشام

یا ذل او هظم یا یا ضیم منّه زاید اونینی

تدری اختک یخوها احسین یا ذل او هظم شافت

یبن اُمی ابطریق الشام طفله امن الظعن طاحت

او وحده بالخرابه اهناک یِمّی شهگت او ماتت

شحچیلک بعد یحسین ثوب الحزن چاسینی

چاسینی الحزن یا حیف زینب فاجده الاخوه

شحچیلک بعد یحسین اروح الکم الف فدوه

های الحرم والایتام  وآنه انخه فرد نخوه

تگل عباس لو جسّم لو لکبر یسلینی

یسلینی او یصبرنی ترانی اهموم ملیانه

جینه انزورکم یحسین ما واحد تلگانه

آنه اختک ربیت اویاک در واحد الغذّانه

یبن امّی او ابوی اشلون بالذله تخلینی

تخلینی او تصد عنی اشلون الگاع ضمّتک

آنه اللی ربیت اویاک زینب های آنه اختک

اُمک فاطمه او اُمی  ربّتنی او ربّتک

هیبتنه الذی چانت تباریک او تبارینی

اتبارینی یخویه احسین انته البیک رفعت راس

چان اتعذرت منّی دلینی ابگبر عباس

گللها ابلسان الحال زینب ذاک ابوالنوماس

یم العلگمی گبره احزام الظهر ویمنی

گامت زینب ابعبره  اتشم اگبور ولیاها

ازیارت اربعین الیوم ما واحد تلگاها

وصلت یم گبر عباس والنسوان ویاها

صاحت  یا چفیلی اشلون خویه الظیم ماذینی

ماذینی الهظم والظیم جاوب یختی اشبیدی

او لن رمله تصیح ابصوت یا عریس یولیدی

یمدلل یبعد الروح لَنصب چاینه ابعیدی

ربیّت او سهرت اللیل أتأمل تجازینی

برباتک سهرت اللیل یولیدی او تعبت اعلیک

های اُمک علی گبرک های الچانت اتربیک

یوم الاربعین الیوم رمله الوالده اتحاچیک

روحی او یا بعد روحی یبنی او یا بعد عینی

عینی او یا بعد روحی او گلبی اتنام عالغبره

او لن لیله تصیح ابصوت الکبر نعتنی الگبره

وین اللی یساعدنی علی^ا اولیدی یدگ صدره

اگل للگاع ها یا گاع ویّه الولد طمینی

طمّینی یگاع الیوم ویّهابنی علی الاکبر

بالتربان اعوفه اشلون اطب للدار ما اگدر

لن ام الرضیع اتصیح نوب اونوب تتعتثر

دلونی ابگبر ابنی ترانی البین عامینی

عبدالله الطفل چاوین گبره او صرخت او صرخن

ویّاها الحرم کلهن من گبر الگبر یبچن

ماجت کربلا امن النوح یوم الگامن ایودعن

فوگ اگبور اهالیهن مصایبهم تبچینی

امصایبهم تبچی او بچت کل المحبین

یوم الاربعین الیوم وصلت له خواته احسین

والسجاد والایتام والعیله تهل العین

او سکنه اتگول ابوی احسین للشیعه اموصینی

******/*

للمرحوم ملا صالح العبادی